"طشطوش" هو مصطلح  بالعامية عرفته عن طريق الصدفه, مع انه امي اللي صرلي عايشه معها أكثر من 22 سنة طلعت بتعرفه...

هذاك اليوم, يوم السبت اللي مرق, رحت أنا وامي وأختي الصغيرة زياره لعند ستي (أم أمي) عشان يعني نشوفها ونطمن عليها كالعادة...

كعدنا حوالين ستي بعد ما سلمنا عليها وسألناها عن أحوالها وصرنا نحكي...

من ضمن هالحكيات صارت ستي تخرفنا عن حصان دار خالي غسان, هذا كان عندهم حصان صغير مربيينه ودايرين بالهم عليه منيح ومش مخلينه معتاز اشي... فجأة بيصحوا عليه وبيلاقوه ميت, ما عرفوا ليش وشو اللي صابه مره وحده, الاشاعه بتقول انه في حيه في الحاره وهي اللي قرصته وخلصت عليه, والله أعلم...

ومن سيرة الحصان, رحنا لسيرة عنزات دار خالي صدقي (اسمه لخالي), هذا خالي حالته مش كثير بتسمحله يتحمل مسؤولية هالعنزات بس راح جابهن, وهن ما قصرن, راحوا ثنتين منهن حبلوا, الاولى جابت اثنين والثانية جابت واحد, يعني صاروا 6, يللا بركه...

لاقينا حالنا في هالقعدة بنحكي عن الحيوانات وصارت ستي تخرفنا عن أيام زمان, أيام ما كانوا دار سيدي يربوا أرانب... جاج... بقر... غنم... سخوله ... بط... وز... وكان عندهم حصان وحمار كمان, كان سيدي الله يرحمه يركب على ظهر الحصان ويروح فيه على الشغل في الخضيرة, والحمار كان يروح فيه مشاوير قريبه مثل الجامع...

هاي أمي كيفت على هالسيره وصارت تحكيلنا كيف كانت الوزه تسرق الأكلات منها كل يوم الصبح قبل ما كانت تطلع على المدرسه وهي صغيره... كانت امي تقعد عند الدرجات اللي برات الدار وبس تلمحها الوزه وفي ايدها الفته تيجي عليها هجوم وتسرقلها اياها وتهزم... طبعا امي كانت تزعل وتكرهها لهذه الوزه كثير... الله يسامحها...

سبحان الله... واحنا بنحكي عن هالحيوانات جابت مرت خالي صينية أكل لستي فيها فخدة جاجه وستي ما كان على بالها توكل من الفخده وحطتها على جنب وتقوم امي تعاكب فيها وتشجعها انو توكلها بس ما قبلت, وهون جابوا سيرة الأرانب... بيقولوا انه لحمة الأرانب أفيد بكثير من الجاج... وحتى اليهود اللي ما بيوكلوه رايهم هيك...

كانت ستي تضحك وهي تحكيلنا عن اليهودي اللي كان ييجي عند دار سيدي أيام زمان عشان يفحص الحيوانات... مهو كان طبيب بيطري... وعلى رايه هاليهودي انه الأرانب أفيد وأحسن من الجاج عشان الجاجات اللي كانوا يذبحوهن كانوا يوخذوا راسهن ويطحنوه ويعملوه على شكل أكل للجاجات الثانيه... أما الأرانب فما بيعملوا معهن هيك...

وهي تخرفنا صارت ستي تقلد في حكياته, كان يقول عن أرانب "اغانب" وصارت تدمج مصطلحات بالعبري, اشي مماش بيجنن...

كان هذا اليهودي كل ما ييجي عندهم يطلب من ستي أكمن رغيف (خبز طابون) لأنه كثير بحبه, ولو انه رغيف واحد كان برضو بدو يوخذه معاه, ومرات كان يجيب مرته وكانت تصدف يلاقي ستي بتخبز في الطابون, ويروح هو مكيف عالآخر خصوصا انه الخبز بيكون سخن... يا نياله...

ومن هون صار مبين على ستي انها مشتاقه للطابون, كانت تعمل عليه أكلات زاكيه اللي اليوم ما بتقدر تسويها لأنها ما بتطلع زاكيه الا وفي الطابون...

على رايها, لحد اليوم خوالي (اسم الله عندي 8 أخوال) بيشتاقوا لهالأكله الطيبه اللي كانت تعملها ستي قبل على الطابون, الأكله اللي ما كان حدا يعملها غيرها وكانوا يموتوا عليها كمان الأصحاب والجيران, كانت ستي تعملها لما يكونوا لمة أصحاب هيك...

نعم, هاي هي أكلة "الطشطوش"... طبعا أنا ما فهمت واستغربت وقلت لامي وستي وقفوا وقفوا, شو هاي "طشطوش"؟ من وين جبتوها؟ ما بعرف يا جماعه كيف بدي أوصفلكم البريق في عنين ستي وامي, ويا حبيبي, صاروا الثنتين يطلعوا فيي ويحكوا مع بعض عشان يشرحولي وأنا تحيرت لميت أطلع...

المهم, هذه الأكله بيعملوها في دبسيه (صينيه) بيشرحوا فيها بصل على شكل دوائر وفوقيها بيشرحوا بندوره بنفس الطريقه, بيرشوا عليها شوية زيت وكمان ملح وفلفل, وبعدين بحطوها في الطابون...

ما بتطلع الأكله من الطابون  والا وهي خالصه من كثر ما هي طيبه...

قلت لستي, طيب ليش ما بتعمليها اليوم؟ بتقلي لأنها زاكيه بس اذا بتنعمل على الطابون... واليوم ما في عنا... واليوم برضو يا ستي طعمة البندوره والبصل وباقي الخضره بتختلف عن أيام قبل, كلها كيماويات وفقدت طعمها الأصلي وما عادت زاكيه زي قبل... الله يرحم أيام زمان...  

امي في البيت بتعمللنا اشي مشابه بس بتزيد لحمه... يعني بتحط لحمه في صينيه وفوقيهن بتشرح البصل وفوق البصلات بتحط البندورة وطبعا مع اضافات الملح والبهار والزيت... وتشويلنا اياها على الفرن وبتطلع يمي يمي... ولا أزكى...

واللي فهمته انه أكلة الطشطوش ازكى بمليون مره من هذا الطبخه...

وأنا صرت اتحسر لانه اليوم ما في طابون عشان يعملولنا عليه الطشطوش... يا ترى بيرجع؟!!!

هذه هي حكايتي مع الطشطوش, اتمنى أنها نالت اعجابكم, ولكم مني أطيب التحيات وأعطرها... واذا في حدا منكم تلاه طابون بالصدفه يجرب يعملها وما ينسى يعزمني هه؟!!!

يللا سلامات...

منال